青心直說：套戥獲利非大戶專利

多隻股份配股抽水影響投資氣氛，大市低位 20659開車，三扒兩撥升到前日高見 22388，係時候整固回氣。呢輪升浪中，具防守性兼息率有番咁上下嘅股份好似香港電燈（ 006）同中電控股（ 002）等都算交足功課，頻創年半高位，現價息率仍超過 4厘。一眾房產信託基金（ REITs）除咗息率吸引，走勢亦穩中有升，冠君產業（ 2778）同泓富產業（ 808）早已升破今年高位，下周二長江實業（ 001）旗下嘅置富產業（ 778）（諧音：齊齊發）亦將以介紹形式，回歸香港上市。
環顧全球房產信託基金市場，跑得最快係美國， 3月整體升幅有成一成，其次係歐洲同日本，分別升 5%及 4.5%。平均息率方面，美國係 3.9%、英國 4.1%、日本 5.7%。


置富產業息率逾 7厘
想了解 03年已喺新加坡上市嘅置富，可參考領匯房產基金（ 823），大家都係屋邨商場，分別在於公屋同私樓。領匯旗下商場要改善嘅已改善，加租嘅已加到盡，雖然資產質素高，升值潛力卻不足。而置富旗下商場包括沙田第一城、馬鞍山廣場、都會駅、映灣坊等商場，整體出租率 96.4%，去年物業收入淨額 4.95億元，每股資產淨值約 6蚊，現時喺新加坡以港元交易市價做緊約 3.62港元，較資產淨值折讓超過四成。
香港本來就係呢隻基金祖家，現價計息率超過 7厘，遠勝領匯，為咗杜絕亞洲果業（ 073）介紹上市大幅波動事件重演，上市代理人同管理人將為基金提供過渡安排，以套戥方式確保基金流通量，減少兩地價格差異及供求失衡機會。
如果大家有新加坡股票戶口，可以有樣學樣，因為嗰邊結算費加埋交易費只收 0.0475%，唔計經紀佣已較香港印花稅加埋嘅 0.109%便宜，買得平大可將基金轉回香港，因為兩邊登記費可獲豁免，待下星期本地掛牌後，再視情況定揸沽都未遲，所以話套戥獲利唔係大戶專利。

胡孟青